E toa 25 frontliners sa latou galueina i le uafu i Matautu se vaa la’uoloa i le Aso 1 o Mati, ua toe aoina mai nei ma faanofo’esea.
O lenei tulaga sa faamautinoa mai i se saunoaga tuu’sao a le afioga i le Palemia le Sao Faapito ia Fiame Naomi Mata’afa mai le motu tele i Salafai i le faaiuga o le vaiaso na mavae atu nei.
Na saunoa ai le taitai o le atunuu i se ripoti a le Komiti o Faalavelave Faafuasei le NEOC na tuuina atu i le kapeneta, o loo ta’ua ai se vaa la’uoloa na taula i le uafu i Matautu i Apia i le aso muamua o Mati, mo le tuuina mai o pusa oloa poo containers mo le tatou atunuu.
O le aso na sosoo ai, na tuua ai e lenei vaa la’uoloa le tatou uafu mo Amerika Samoa. Ae peitai o le taunuu atu o lea vaa i Amerika Samoa ma faatino ai loa siaki masani mo le au vaa poo tagata faigaluega i luga o le vaa, ma māua ai e toafa nisi o le au vaa poo seila o loo iai le siama (positive) o le Koviti.
Saunoa Fiame, i tulaga aloaia o faigamalo na vave ona logoina mai tatou e Amerika Samoa e faatatau i seila ia o loo faamaonia i le siama.
O lea la sa faataunuu ai loa gaioiga i Samoa nei, mo le aoina mai o i latou sa galulue i le taimi na taula ai le vaa i le uafu i Mulinuu, mo le faanofo’esea mo le lua vaiaso.
Sa saunoa le Palemia e faapupula atili le taunuu mai o vaa la’uoloa, e le vavalalata a tatou tagata o loo galulue i luga o le uafu, ma i latou o loo i luga o nei vaa..
“Vagana ai le au faigaluega a le Matagaluega o le Soifua Maloloina pe afai e ō e faatino ni suesuega.”
Ae o le tulaga ua faanofo’esea ai le toa 25 o le aufaigaluega, o se gaioiga e malu puipuia atili ai le mamalu o le atunuu.
“Talosia ia o loo malu puipuia le aufaigaluega ma le avanoa ai le pipisi atu i tua o le faamai.
O Samoa nei ua lata i le 90% tagata matutua 18 tausaga agai i luga, ua maea tui muamua ma tui lona lua. Ae ua tatala nei foi le avanoa e fai ai boosters poo tui puipui lona tolu.
O le faasologa o tui mo tamaiti aoga e toe faaauau lea i le vaiaso fou amata atu taeao, Aso Gafua 7 Mati.
(0)
