$20,000 le Fesoasoani a le Faletupe o Tagatanuu o Samoa mo le Au Siisii

"O le au masii e toa sefulu alii ma tamaitai, o le a faaigoaina nei o le National Bank of Samoa, Samoa Weightlifting Team"

0
125

E luasefulu afe $20,000 se tino i tupe sa tauaaoina e le Faletupe o Tagatanuu o Samoa, le National Bank, mo le au siisii a le atunuu auā a latou tapenaga mo taamilosaga o le Oceania o loo sauni atu iai nei.

O le taeao o le Aso Faraile sa asiasi atu ai le au atoa a le atunuu faapea le Peresitene o le Samoa Weightlifting Federation, le afioga ia Tuaopepe Asiata Jerry Wallwork, mo le tuuina atu o lenei meaalofa tupe mai le pulega o le faletupe National Bank of Samoa.

O le afioga ia Peseta Peter Tone sa fai ma sui o le pulega a le National Bank, na ia tauaaoina le foai, faatasi ai ma se saunoaga faalaeiau, e faamanuia ai i tapenaga uma o le faamoemoe.

Faamautu le faigapaaga a le National Bank o Samoa ma le Au Siisii a le atunuu.

Sa faaleo e Tuaopepe o ia fo’i o le Faiaoga Ta’iulu a le au siisii, le agaga o le faafetai ona o lenei faigapa’aga ma le National Bank, ae maise le lagolago a le faletupe i taumafaiga a le au siisii.

“Ua saga faalototeleina ai pea le au taa’alo, ina ia ausia se tulaga lelei, e lē gata o se pine auro, ae o se avanoa e mafai ai ona agavaa (qualify) le tatou au mo le taamilosaga siisii a le Olimipeka i Farani.”

Ua saunoa foi Tuaopepe, o le au masii e toa sefulu alii ma tamaitai, o le a faaigoaina nei o le National Bank of Samoa, Samoa Weightlifting Team.

“National Bank of Samoa, the name behind the nation’s Weightlifting Team.”

E toa sefulu le au a Samoa o le a masii atu i Niu Sila mo le taamilosaga Oceania.

Toe tasi le vaiaso ona tuua lea e le au siisii a le atunuu laufanua o Samoa mo Niu Sila e faatino ai lea taamilosaga.

Saunoa Tuaopepe, e fai lava foi si maualuga o lea faamoemoe ona o le a finau ai atunuu mo se avanoa e sao atu ai a latou au mo Farani.

O Samoa e toalua ē ua agavaa mo le Olimipeka. O Don Opeloge ma Iuniarra Sipaia lea sa agavaa ia Setema 2023 ina ua maea se taamilosaga sa faia i Saudi Arabia.

O le taamilosaga o le a faatautaia lea mo tupulaga laiti, tupulaga talavou ma le au matutua.

E toasefulu alii ma tamaitai o le tatou au e aofia ai:

* Seine Stowers – 71kg

* Vatu Opeloge – 76 kg

* Lesila Fiapule – 81 kg

* June Sipaia – 81+kg

* Vaipava Nevo Ioane – 66kg

* Tovio Ah Chong 81kg

* Maeu Nanai Livi – 81kg

* John Tafi – 71 kg

* Don Opeloge 104 kg

* Sanele Mao – 105kg

O le pulega a le tatou au e aofia ai Tuaopepe Jerry Wallwork, Ele Opeloge, Toafitu Perive, Hitila Tuuamalii Opeloge faapea Ola Salimu.