Tusia: Pesetā Tusiga Taofiga, Gvt Press. Ua fofogaina e le afioga i le Palemia iā La’aulialemalietoa Leuatea Polāta’ivao Fosi Schmidt le fa’ai’ugāfonoina e le Kapeneta, o le lua vaiaso e mālōlō uma ai galuega a le Mālō, se’i vaganā ai auaunaga e matuā mo’omia pea [essential services] e aofia ai Leoleo, Falema’i, Tineimū, Suāvai, ‘Eletise, Ofisa o Femalagā’iga a Samoa, Ofisa o Tiute, Va’a feoa’i i le va o Upolu ma Savai’i, aufaigaluega mo le Malae Va’alele ma isi.
E le’o aofia i lea fa’ai’uga ia pisinisi tumā’oti ma i latou o lo’o faigaluega ai, ma o lo’o ta’oto fa’ai’uga i Pule Sili o ia pisinisi mo le fa’atulagaina o aso mālōlō mo i latou nei.
Mo le silafia, ua fa’asilasila fa’alaua’itele mai e le Matāgaluega o Pisinisi, Ālamanuia ma Leipa [M.C.I.L.] ia Aso Mālōlō mo Tagata Uma [Samoa aoao] e tusa ai ma aiaiga o le Fuai’upu 2 o le Tulafono o Aso Mālōlō mo Tagata Uma 2008, o ia aso ua atofaina e aofia ai;
1. Aso Tofi, 25 Tesema 2025
2. Aso Faraile, 26 Tesema 2025
3. Aso Tofi, 1 Iānuari 2026
4. Aso Faraile, 2 Iānuari 2026
O lo’o manino fo’i i lea fa’asilasilaga, e mafai lava ona tatalaina pisinisi tumā’oti i ia Aso Mālōlō e tusa ma aiaiga o le Tulafono o Aso Mālōlō mo Tagata Uma 2008.
Ma o le fautuaga mai le M.C.I.L. aga’i i Pulega o ia Pisinisi Tumā’oti o le ā tatala i Aso Mālōlō, ina ia usita’ia Vaega talafeagai o le Tulafono o So’otaga Va Lelei o Leipa ma Galuega 2013, e tusa ai ma le totogiina o tagata faigaluega pe ā galulue i nei Aso Mālōlō.
Mo le aufaigaluega a le Mālō lava ia, ua saunoa manino le Palemia, o le lua o vaiaso ua fuafuaina e mālōlō ai le aufaigaluega a le Mālō, e amata atu i le;
I. Aso Gafua, 29 Tesema 2025 – Aso Faraile, 02 Iānuari 2026.
Fa’aauau atu ai i le isi vaiaso i le;
II. Aso Gafua, 05 Iānuari 2026 – Aso Faraile, 09 Iānuari 2026.
Ona toe a’e uma loa lea o galuega a le Mālō i le isi vaiaso fou, amata atu i le;
III. Aso Gafua, 12 Iānuari 2026.
Saunoa La’aulialemalietoa, e tāua le maua o se malologa lelei mo le aufaigaluega uma a le Mālō, ia mafuta lelei ma ‘āiga fa’apea fanau, ma fa’amanatu fa’atasi ai le agaga o le Kerisimasi ma le Tausaga Fou 2026 a’o le’i toe fa’aauauina galuega masani o lenā tausaga fou 2026.
Need a Personal Loan for Christmas?
Pre Christmas Deals!
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
