O taiala fou mo suafa matai, e tusa ai ma le faasalalauga a le Ofisa o le Loia Sili – e le toe mafai ona alaala se matai sa’o i atunuu i fafo; pe faitau foi faapea – e le toe mafai ona faaeeina se matai sa’o o se aiga, i se tasi o loo nofo mau i atunuu i fafo.
E le toe taliaina foi e le tulafono le tapa o le ipu, poo le lē auai o se tagata i le taimi o lana saofai.
O se pepa lenei o faamatalaga mai le Ofisa o le Loia Sili o Samoa ua lomiaina atu i lalo:
O lenei Pepa o Faamatalaga o loo faaalia manino ai aiaiga ma taiala fou mo le fa’ae’eina o suafa matai i lalo o le Tulafono o Fanua ma Suafa 2020 (“LTA”), ae faapitoaugafa lava lenei faamaninoga i le Vaega 4 – Suafa Matai
- O taiala fou nei mo le fa’ae’eina o suafa matai, o loo iai i lona taatiaga manino i lalo o le fuaiupu 13 ma le 15 o le Tulafono o Fanua ma Suafa. O le vaaiga taulai, i le fausia ai o nei aiaiga ma taiala fou, ina ia puipuia ai tulaga taua o le faamatai, ma toe faatulaga ai le faamatai fua i manatu faaalia mai faatalatalanoaga faalauaitele sa faatinoina faatatau i Tulafono Taufaaofi e tolu; Tulafono Taufaaofi o Teuteuga o le Faavae 2020, Tulafono Taufaaofi o Fanua ma Suafa 2020 ma le Tulafono Taufaaofi o Faamasinoga 2020. O se tali foi lea i manatu na faaalia fatatau i se lafo faatu na aiaia ai le aofaiga o matai sa’o e mafai ona filifilia. O lenei aiaiga ua aveesea mai totonu o le Tulafono o Fanua ma Suafa ma o le faaiuga mo le filifiliaina ma le aofaiga o matai sa’o e taatia pea i le faautautaga tatau ma le faaiuga autasi a Suli ma Aiga.
- O le aotelega o nei taiala fou o loo i lalo o le fuaiupu 13 – Matai Sa’o o le Tulafono o Fanua ma Suafa ma o loo aiaia ai:
- o le filifiliga ma le aofai o Matai Sa’o o le a lē tatau ona faaitiitia ai le aloaia ma le taua o le Matai Sa’o; ma
- o le sauniga o le faaeeina atu o se suafa Matai Sa’o e tatau on usitaia le fuaiupu 15 –
Tulaga aloaia o le faaee atu o se suafa matai; ma
3. o le Matai Sa’o i le i ai faatasi ma ana matafaioi o le tautuaina o le aiga potopoto, e tatau ona nofomau i totonu o Samoa ma i ai i totomu o lona aiga ma le nuu e tauave tiute ma matafaioi e faatino e se Matai Sa’o
- I le ma lea, o le fuaiupu 15 – Tulaga aloaia o le faaee atu o se Suafa Matai, o loo faamanino atili ai tapu o le faaeeina o se Suafa Matai, e aofia ai le faamautinoaina le auai o le tagata ua faaeeina iai se Suafa Matai1. O lenei aiaiga e poupoutū ma puipuia ai o tulaga aloaia o le Faamatai.
Ia nofo silafia o lenei aiaiga e lē aafia ai suafa matai ua maea ona fai, ma e lē a’afia ai i latou o loo umiaina ni Suafa Matai i le taimi nei.
