19 Tausaga o se Alii Talavou ua Molia i lona Avea ma Faia ni Amioga Mataga i se Teineitiiti

0
8649

E sefulu ma le iva tausaga o se alii talavou ua taofia nei ma molia e leoleo, i se mataupu sa tau sāili ai se teineitiiti 7 tausaga na leiloa mai i tua o le fale o le Malo, i le nofoaga o le Frienship Park.

Sa alu le po o le Aso Faraile talu ai, o tau saili e leoleo le teineitiiti ina ua lipotia atu e ona matua, peitai, e pei ona tali mai ai le Komesina o Leoleo, le afioga ia Auapaau Logoitino Filipo, o le taeao o le Aso Toanai pe tusa o le 7 i le taeao, na momoli ane ai e se aiga mai Matautu-Uta lea afafine, i le Ofisa o Leoleo i Apia.

Saunoa Auapaau, “Sa tau saili solo e leoleo si afafine i le po lena.. sa su’e solo i tua o le fale o le Malo, e oo atu lava i Mulinuu..”

“Sa tausāili foi e leoleo gatai o le sami, ma le popolega nei te’i ua iai se faalavelave na tulai mai i le sami..”

O le aiga mai Matautu-Uta sa latou momoli ane le afafine i le fale o leoleo, e faapea se latou faamatalaga, sa latou mauaina le teineitiiti o loo tagi i autafa o le latou fale i le te’a o le 10 i le po o le Aso Faraile.

O le teineitiiti sa leiloa, ma lona tina. Ata pueina ma tuuina mai e le Matāgaluega o Leoleo.

O le mau a lenei aiga sa tuuina atu i leoleo, e le’i mafai e le teineiiti ona ta’u ane ia i latou poo fea e iai sona aiga. Ona latou avea loa lea o le teineitiiti, ma latou momoe.

O le taeao e sosoo ai, i le mau a lenei aiga, sa faatoa latou iloa ai le faasalalauga a le Matagaluega o Leoleo, ma latou oo atu ai loa e ave le afafine i le ofisa o leoleo i Apia.

Ina ua fesiligia e le Samoa Global News, pe aisea e le’i tuuina vavae atu ai e lenei aiga le teineitiiti i le Ofisa o Leoleo, o le tali, e le’i iai se latou taavale.

O moliaga faasaga i le talavou 19 tausaga, e aofia ai moliaga o taufeusuaiga (sexual). E le’i mafai ona faamautinoa mai pe sa faamalosia e lea alii le teineitiiti (rape), ae o loo faagasolo pea suesuega a leoleo.

⁶O le Vaega 53 o le Tulafono o mea Tau Soligatulafono o loo molia ai lenei alii talavou. (Section 53 of the Crimes Act). I se faamatalaga mai le Matagaluega a Leoleo, o loo fetuunai (review) nisi o moliaga e pei o le avea faamalosi o se isi (kidnapping).

O le tulai mai ai o lea faalavelave ua tuualalo mai ai le Komesina o Leoleo i le pito laau a matua, ia tautuana le saogalemu o fanau. Ua faamanatu mai ai foi e le Komesina i matua, o se solitulafono lou faatamala i le vaaia lelei o fanau.

Public Notices 

 

Please note change of time from 11am to 12:30pm