O se tasi o mataupu na faamanino e le taitai o le atunuu i lana feiloaiga ma tusitala ma ofisa faasalalau i le vaiaso nei, o tuuaiga a le taitai o le itu agai ia Tuilaepa Sailele Malielegaoi, lea na ia faasalalauina e faapea ua pāsia se faaiuga a le Kapeneta e totogi ai e le Malo le seleni sa faatupe ai le siiga gasegase a le Palemia i Aotearoa Niu Sila.
I se Tusi i le Faatonu (Letter to the Editor) a Tuilaepa i le Aso Faraile 21 Novema 2025 sa saunoa ai le taitai o le HRPP, o le a totogi e le Malo le tau o le falemai ma togafitiga a le Palemia, ma ia faapea mai e sese se mua’i faamatalaga, lea sa faasalalau ai o loo totogi lava e le afioga ia Laaulialemalietoa ma lona aiga na tulaga uma.
“This incident comes at the same time that Cabinet has finally approved full payment of the Prime Minister’s hospital costs as a matter of government policy, correcting the misinformation issued earlier on who would bear the expenses.”
Na saunoa manino Laaulialemalietoa, e le sa’o nā tuuaiga uma ua faasalalauina e Tuilaepa.
“E sese lea upu!’
“E leai lava se sene se tasi a le Malo na ave ai a’u i le ma’i lea na o’u alu ai..
“Ma e leai fo’i so’u fa’amoemoe e toe totogi mai e le Malo se tupe.”
O tuuaiga a Tuilaepa o lo’o fa’alauiloa fa’alaua’itele i lana Tusi i le Faatonu o loo agiga i luga o upegatafa’ilagi.
O lea mataupu sa mae’a foi ona fa’amanino e le Palemia i le Aso Gafua 17 o Novema ina ua fesiligia e tusitala poo iai se fuafuaga e toe tapã ai le toe totogi atu e le Malo o le seleni a lona aiga, na faatupe ai lana siiga gasegase.
Sa tali manino Laaulialemalietoa, e tusa ai ma faasalalauga ua tuanai atu, “O mea lava ua tusia, ua tusia lava.”
“O lea na ou talanoa atu o a’u ma la’u fanau e totogia, o le a totogi ia e la’u fanau, ma e leai se fa’amoemoe ou te toe tapā le Malo mo se “reimbursement” ua lava lea, atonu e fai fo’i ma fa’ata’ita’iga lelei a toe ma’i fo’i se isi ta’ita’i o le atunuu ia totogi e ia lona pasese e alu ai.”
O faiga faavae lava ia a Samoa, e tatau ona totogi e le Malo togafitiga uma tau soifua maloloina o soo se tasi o loo tula’i mai i le tofi Palemia. O le tulaga fo’i lena sa faia mo Palemia ua tuanai atu ae maise le silia ma le 20 tausaga o Palemia le afioga ia Tuilaepa Sailele Malielegaoi.
Peita’i e pei ona faamanino e Laaulialemalietoa ina ua tula’i mai lona fa’atafagasegase, e tapa atu i le Malo e leai se tupe, talu ona o le vaitau tonu lea o loo fa’agaioi ai le Malo i lalo o le 25 pasene ina ua le pasia le paketi ia Iuni.
“Ua tou silasila outou i fa’amatalaga nei e alu, lea ua tu’ua’i ua uma ona pasia ua totogi uma e le Kapeneta le tupe o la’u malaga.”
“O ī tonu lea e mafua ai ona ou faiatu e ese le mafatia i le tulaga lea, ona o fa’amatalaga lea e alu i le taimi nei, o tala e lē fa’avaea ma tala e lē sa’o.”
Na aumai ai fo’i e le Palemia ma le lu’i i le au tusitala ma ofisa fa’asalalau.
“E ese lo’u fia fa’alogologo ae tou o la e lu’i le tala lea, po’o le a le mea e mafua ai pea ona gagana i le tulaga lea o le tu’uaifuaina ma tele ai le fe’ese’esea’i.
Saunoa le Palemia e lata i le $200,000 tala le fa’atupeina atoa o lana siiga gasegase. Ae e lē o iai sona toe manatu e toe faatumu pe reimburse e le Malo o Samoa.
Important Public Notices
- 16 locals and 14 overseas-based applicants Pass the Malua Entrance Exam - October 13, 2026
- Fuafua le Malo e Toe Faatū Nofoa e Lua mo le Au Palota Tu Taulaga - October 11, 2026
- Tumau Tuia Pu’a Fuatogi Letoa i le Nofoa o Safata 2: Teena le Talosaga a Leleua - October 9, 2026
