O loo faaauau pea ona nofo taofia i le vaavaaiga a leoleo se tama o loo tuuaia i lona fai aiga faamalosi i ona lava afafine.
O Opeloge Opeloge 40 tausaga o Vaoala na tulai i luma le Faamasinoga Maualuga i le amataga o lenei vaiaso.
I taualumaga o le faamasinoga na talosaga ai le itu a leoleo mo se isi taimi faaopoopo sei faamautu ai moliaga a leoleo (finalise charges).
Peitai, o faamaumauga a le itu o leoleo i lenei mataupu, e toalua nisi o tamaitai i lalo o le 20 tausaga o lana fanau teine (biological daughters) o loo aafia i sauaga matagā tau faiaiga faamalosi, o loo tuuaia ai lenei tama.
O le tausaga 2021 seia oo mai le tausaga 2025 lea o faamauina i suesuega a leoleo na faatino ai le soligatulafono.
Na talia e le afioga ia Fepuleai Ameperosa Roma le talosaga a le itu o leoleo ma faatulaga ai le Aso le 28 o Iulai e toe fofogaina ai lenei mataupu seia faamautu moliaga a leoleo.
Na molimauina i totonu o le potu faamasino le auai ai lea o nisi o le aiga o Opeloge, o nisi sa fai ma ave fu’a a Samoa i le taaloga o le Siisii, e tapuaia ma feiloai atu ia Opeloge.
O loo faaauau pea ona nofo taofia Opeloge i lalo le vaavaiga a leoleo e talia ai le Aso Gafua o le vaiaso fou, e toe tulai ai i luma o le faamasinoga.
O le tasi lea o soligatulafono ua maualuga ai le fuainumera o le itupa o alii o loo molia ai i luma o le faamasinoga – o tamā matutua, o faifeau, o matai, faapea ma le tupulaga talavou e oo lava i fanau tama laititi ta’i 15 tausaga ua aafia lava i le faia o soligatulafono poo gaioiga tau sauaga matagā i fanau teine.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
