Ua momoli se tuualalo a le Matagaluega o le Soifua Maloloina agai i le Matagaluega o Aoga, ina ia toe silasila pe tatau ona faaopopo se isi vaiaso o le tuuaga a le fanau.
O le tulai mai o le faafitauli o le siitia maualuga o le fuainumera o i latou e aafia i le faama’i o le dengue fever, o le faapogai lea o le talosaga a le Matagaluega o le soifua maloloina I le matagaluega aoga mo se isi vaiaso faaopopo e malolo ai pea fanau aemaise lava i aoga faata’ita’i ma aoga tulagalua.
I se faatalatalanoaga ma le sui ofisa sili o le soifua maloloina le afioga Tagaloa Robert Thompson, na ia saunoa ai, “E lua ituaiga faama’i o le dengue fever lea e aafia ai Samoa, ma o ia faama’i e tutusa lelei auga e vaaia i le tagata pe a aafia ai..”
“E tutusa foi ituaiga iniseti lea e feavea’ia, tutusa foi ituaiga siama lea e pepesi ai faama’i nei.”
O le saunoaga le ofisa sili, o faama’i nei e lua o loo maua i Samoa, ae a faatusatusa atu i Fiti e tasi le ituaiga dengue fever o loo aafia ai Fiti.
I faamaumauga a le matagaluega mai le masina o Iuni e oo mai le aso 6 Iulai ua faamauina e 237 le aofai o le atunuu ua faamauina le aafia i le dengue fever.
Saunoa Tagaloa, “O se itu ua mata’itu e le matagaluega ona o loo siitia maualuga le fuainumera.
O fanau iti i le 4 tausaga seia oo atu le 19 tausaga lea o loo pito sili ona aafia i le dengue fever e tusa ma faamaumauga le matagaluega.
Ua faamanatu mai le matagaluega e tauala mai le sui ofisa sili, mo le mamalu o le atunuu, aemaise lava i matua, faapea foi mafutaga a faletua ma tausi ma le aualuma, ia tautuana le toe faaolaola i asiasiga tumāmā i autafa o maota ma laoa ma ia tineia vaega e loo to’a ai suavai e ono tau tuufua ai namu.
O le faamanatu a le soifua maloloina e mafai ona tineia le dengue fever pe afai tatou te tūtū faatasi.
O auga vaaia lenei faama’i e tigā le ulu, fiva, gagase tino, tigā so’oga ponaivi, faasuati ma faafaufau.
O le vai aoauli ma le fualaau mea tigā o le tino – pau lea o fōfō mo soo se tasi e aafia le dengue fever.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
