Ua sii le aao o le afioga i le tupufia e tauva mo le faigapalota o loma nei, ma saili ai sona avanoa mo le tofi o le itumalo o Faleata I.
O le taeao nei na masii ai le pule mamalu a Alii ma Faipule o Lepea faapea nisi matai o le itumalo o Faleata I, e momoli le afioga ia Faumuina Opapo Soana’i i le vaega faaupufai e Puipuia le Aia Tatau a Tagata poo le HRPP.
Na molimauina i ala ata poo le itulau a le vaega faaupufai lea faamoemoe.
Na saunoa le taitai le susuga ia Tuilaepa Sailele Malielegaoi e talia aloaia le toai taunuu atu o le tupufia ma le itumalo.
O le afioga ia Faumuina Opapo sa tautua o se faifeau i le Ekalesia Faalapotopotoga Kerisiano i Samoa mo tausaga e tele.
Peitai na ia tuua le galuega ina ua filifilia e lona aiga na te tauaveaina le suafa Faumuina.
O le masina o Mati 2021 na faia ai le faafotutupu a Opapo i le suafa Faumuina.
O Faumuina Opapo o loo avea ma Faamasino o le Faamasinoga o fanua ma suafa le taimi nei. Peitai, e le’i faalauiloa mai poo ua faamavae mai lona tofi Faamasino.
O le itumalo o Faleata 1, e 13 afioaga e aofia ai Vaimoso, Fatipule, Vaitoloa, Ululoloa, Tuaefu, Tuanaimato, Seesee, Alafua, Moamoa, Sinamoga, Lotopa ma Pesega.
I faamaumauga a le Ofisa o Faigapalota e 7,701 i latou ua agavaa mo le palota poo le aofai lea o le lola.
O le afioga ia Manuleleua Paletasala Tovale o loo avea ma faipule o le itumalo i le taimi nei, o se sui mai le Faatuatua i le Atua Samoa ua Tasi.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
