177 Moliaga o le Gaoi a o Avea ma Tagata Faigaluega o le National Bank of Samoa

0
6169
National Bank of Samoa, ACC Building Apia.

E 177 moliaga o le gaoi a o avea ma tagata faigaluega o le National Bank of Samoa, ua teena nei e se tamaitai i luma o le Faamasinoga Maualuga.

Check these out at Le Well

I faamaumauga a le itu a leoleo e faapea, o seleni mai teugatupe a le mamalu o le atunuu o loo faaaogaina lea auaunaga, sa toesea e lē o loo molia.

O le mau a suesuega a leoleo, na amata ona faatino i le tausaga talu ai, 2022, ma e eseese uma taimi na toeseina ai seleni mai teugatupe.

E silia ma le $100,000 le tino i tupe o loo tuuaia ai le tina ia Upuia Suaalofi Matilalefofoa.

Sa faasaina e se tasi sui o Malu o le Malo sa tiute i fafo atu o le potu faamasino le aufaigaluega a le Samoa Global News ona pueina se ata o lē ua molia.

Ata pueina i le telefoni a Rodney Tafeaga ina ua faasaina e leoleo ona ia pueina se ata o lē ua molia.

O le susuga ia Rodney Tafeaga sa faatonuina e leoleo, e tuu ese lana mea pue ata ona e faasa ona ia pueina se ata o Upuia Matilalefofoa.

I suesuega a le Samoa Global News poo lea le mafuaaga ua faasaina ai le galuega masani a e au tusitala i le fale faamasino, sa māua ai, o lē ua molia o le faletua o tasi o Taailua Alii Malu o le Malo.

Ua faatulaga e lana Afioga i le Faamasimo ia Fepuleai Ameperosa Roma, le Aso 24 o Iuni 2024, o le a toe fofogaina ai lenei mataupu e suesueina ai mau o le itu a leoleo.

O loo tatala pea i tua lē o loo molia, i lalo o aiaiga e aofia ai le tuuina atu o ana pepa malaga, saini i le ofisa leoleo i Apia i vaiaso taitasi ma ia aua nei taumafai e fesootai molimau a le itu a leoleo.

I mataupu lava faapea, na tulai foi i luma o le Faamasinoga Maualuga le tamaitai ia Seira Malifa, o loo tuuaia i le aveesea mai le o se tino i tupe e $1.5miliona a o avea ma tagata faigaluega o le faletupe o le ANZ.

E 330 moliaga a le itu a leoleo ua ia ioeina, ae teena moliaga e 25.

Ua faatulaga foi e le Faamasinoga le Aso 18 o Iulai 2024, e suesue ai mau a moliaga e 25 o loo tetee iai Malifa.

Public Notice: