$1 Miliona Faaagaga mo le Toe Faaleleia o le Falemai Tele Motootua

E lē nātia le tele o fa’afitauli ma lu’itau o feagai nei ma le Falema’i Tele i Moto’otua, ona ua fa’aleagaina nisi o vaega o lea falema’i, ma ua matuā mo’omia ai le toe fa’aleleia atoa.

0
289

30 Me 2024, Apia Samoa, Pesetā Tusiga Taofiga, Sooupu a le Malo.  Ua ta’oto le fuafuaga a le Mālō mo le toe fa’aleleia o le Falema’i Tele i Moto’otua, auā le soifua mālōlōina o le atunu’u e afea lea nofoaga fa’atasi ai ma le aufaigaluega galulue a le Matāgaluega o le Soifua Mālōlōina.

E lē nātia le tele o fa’afitauli ma lu’itau o feagai nei ma le Falema’i Tele i Moto’otua, ona ua fa’aleagaina nisi o vaega o lea falema’i, ma ua matuā mo’omia ai le toe fa’aleleia atoa.

Molimauina fo’i atugaluga a nisi o le atunu’u, aga’i pea i le tulaga fa’aletonu o nisi o vaega o le auaunaga i le falema’i, ma e lē saogālēmū mo le soifua mālōlōina o nai o tatou tagata.

I le folasia ai o le Tala Fa’atatau Autū o le Tupe 2024/2025, na manino ai i le saunoaga a le Afioga i le Minisitā o le Matāgaluega o Tupe iā Lautimuia Afoa Uelese Va’ai, le fa’aagaga ai lea o le $1 Miliona mo le fa’aleleia atoa o lea falema’i.

Sa fa’ailoa e le Minisita, o le tausaga fa’aletupe o le a mae’a nei, na i ai le vaegātupe mo le toe fa’aleleia o falema’i fa’aitumālō i le atunu’u atoa.

Peita’i o le $1 Miliona ua fuafuaina, o le a aga’i tonu mo le falema’i tele i Moto’otua. Ina ia toe fa’aleleia vaega uma ua fa’aleagaina, ina ia soifua manuia nai o tatou tagata.

Fa’ailoa e Lautimuia, o lo’o fa’atalanoa i le taimi nei, a tatou pa’aga fa’avāomālō, auā se fesoasoani fa’aopoopo e fa’amae’a lelei ai le fa’aleleia o lenei galuega tāua.

O lo’o talosaga fo’i i le Mālō o Saina, ina ia latou toe fa’aleleia le falema’i tele lenei, e ala i ā latou Konekarate sa fausia lenei falema’i i tausaga ua mavae, auā o lo’o fausia lea aseta tele a le Mālō fua i fausaga o fale a Saina.

O lo’o ta’oto fo’i se tu’uālalo a le Mālō iā Saina, ina ia mafai ona latou fausia so’o se atina’e a Samoa pe a fesoasoani mai, fua i le auivi o fausaga o fale o lo’o tatou manana’o ai, ae ‘aua ne’i fausia e tusa ma a latou lava fausaga.

O lo’o fa’atalanoa fuafuaga a le Komiti Galue o lo’o taulāmua ai le Matāgaluega o Tupe, auā se aso mo le asiasiga fa’apitoa a le Kapeneta ma Fa’auluuluga o Matāgaluega ma Fa’alapotopotoga Tumā’oti a le Mālō, e silasila ai i vaega uma ua fa’aleagaina i lea falema’i tele.

O lea mae’a o lea asiasiga, o le a iloa ai le aso e fa’ataunu’uina ai le toe fa’aleleia atoa o lenei falema’i tele i Moto’otua.


Tusiga Taofiga