“Aumai le tou faatuatuaga, o le a saili ma momoli atu” – Alii ma Faipule Salelavalu

0
53

E toatolu ni alii o loo sailia pea e leoleo, o loo masalomia i le aafia ai o Alii Malu o le Malo i se osofaiga a leoleo i se faatoaga mariuana i ga’uta o le afioaga o Salelavalu.

E pei ona faasalalauina e le matagaluega, ma faamaonia mai i se saunoaga a le Sui Komesina o Leoleo ia Papalii MonalisaTiai-Keti, o le taunuu atu o le osofaiga a leoleo i se faatoaga mariuana i ga’uta o Salelavalu, na tali ane ai i latou nei e toatolu i ni laau malosi.

E toatasi sa ia tafagaina leoleo i se laau malosi 12 gauge (shot gun) ma mafua ai ona faamanualia nisi o leoleo.

E lei manuia taumafaiga a leoleo e tapu’e i latou ia e toatolu, peitai, na sosola ese mai le faatoaga.

Ae ua tā’ua e le Sui Komesina, o le taeao nei o le Aso Gafua, sa faia ai se feiloaiga i le va o leoleo i Savaii ma le paia o le afioaga.

Sa momoli mai ai se talosaga a le afioaga, e tuuina atu le faatuatuaga, ae o le a saili ma momoli ifo e le afioaga taulelea o loo sailia nei.

O nei taulelea e omai uma lava i Salelavalu.

O alii leoleo e toalua na aafia, o le tasi na faamanualia lona aao (lima) ae o le tasi alii e faapea o le pisi poo le salalau o le ututau pulufana 12 lea na aafia ai ona foliga.

O le isi alii leoleo e sau mai le afioaga o Salelavalu. E fai uma o laua aiga faapea ma fanau, ae ei le va o le 25 agai le 40 tausaga le matutua.

I le saunoaga a Papalii, e lei faamautuina mai se aofai o laau mariuana sa avane i le ofisa o leoleo i Tuasivi.

O i latou e toatolu o loo tausailia nei, e aofia ai
1. Manuia Lafaele Tanuvasa
2. Masina Lega Taulelei
3. Apisoloma Setu.

Na faafetaia e le afioga ia Papalii le lagolago atu o le paia i le afioaga e ala i le galulue sosoo tauau ma le matagaluega, lea ua faafaigofie ai le faatinoga o le galuega.