12 Tausaga le Faasalaga Falepuipui a se Tamā Matua mo le Fasioti Tagata Paivalea

Ua tuuina mai se faasalaga e 12 tausaga ma le 6 masina mo se tamā matua e 69 ona tausaga, ina ua ia ioeina le moliaga o le fasioti tagata paivalea.

O le aso muamua o Ianuari 2021 na maliliu ai ni tamā se toalua mai le afioaga o Afega, ina ua faa’aoga e Vaotuua (Vao) Faalavaau Tai’i Auleoleo Neemia Pologa mai le afioaga o Siufaga Falelatai, se laau malosi e faaoo ai le maliu iā i la’ua uma.

O se faalavelave matautia, ma sa maitauina le vave ona faatino e aiga ma le afioaga o Siufaga faapea le itumalo o Falelatai le ifoga i aiga uma e lua a ē na maliliu.

Ua silia ma le tolu tausaga lenei faalavelave, ona sa umi feutanaiga a loia a le Ofisa o le Loia Sili, ma iu ai lava ina tuu ese le moliaga o le Fasioti Tagata Faamoemoeina (murder), ae tuuina atu le moliaga o le Fasioti Tagata Paivalea (manslaughter) – e ui ina tele molimau sa vaai tino i lea faalavelave i le po o le vaeluaga.

Sa tali Vaotuua e ioeina le moliaga, ina ua tuuina mai i lalo i le Fasioti Tagata Paivalea.

O le Aso Lulu la lea sa tuuina mai ai e le tamaitai faamasino ia Tologata Tafaoimalo Leilani Tuala-Warren o le Faamasinoga Maualuga le faasalaga o le 12 tausaga ma le ono masina i le toese. Sa maitauina ona o le tūgā tele o lenei faalavelave, le amata mai o le faasalaga i le 25 tausaga (starting point), ma o se tapulaa pito sili lea ona maualuga i Samoa. O le masani lava o le fasioti tagata paivalea, o le 12 tausaga e amata ai.

O Elisara Lole Fata na maliu i se man’ua i lona fatafata mai se pulufana, ae o Fata Utufua Fata, na maliu i ni man’ua mai se pulufana i lona fatafata ma lona muliulu.

O le uluai suesueina o lenei mataupu na teena ai e Vaotuua moliaga o le fasioti tagata faamoemoeina (murder) peitai o le aso 19 Oketopa 2022, na ia ioeina ai le moliaga o le fasioti tagata pa’ivalea (manslaughter) e tauala mai lana loia ia Mauga Precious Chang.

Elisara Fata

Sa faailoa i luma o le faamasinoga se ripoti tusitusia a le toalua o Elisara Fata, e faamatala ai ni aafiaga ona o le to’esea ai o le tamā o le aiga.

Ua tele le aafiaga i lona aiga, i tiute ma feau faatama ma ua faigata tele ona tausi toatasi le fanau, aua o Elisara lava sa faamoemoe lava iai.

Ua iai le faamoemoe e vaetama lana pepe, ae saili se galuega mo le fanau. Ua ia misia Elisara ma e le mafai foi ona faagalo e le fanau.

Fata Utufua

Na faailoa foi e le tina aafiaga o le to’esea ai o le tama o le aiga. O Utufua lava sailia tupe mo le matou aiga. Ua matou misia tele ma le fanau, ona e faigata ona galo ona uiga. O loo soifua le tina matua o Fata Utufua, ma ua misia tele foi e le loomatua lana tama.

Itu Ogaoga o le Solitulafono

* o se aupega ua maea ona utuina

* o se aupega e le faatagaina i Samoa

* o i la’ua ua maliliu, e lei mafai ona tali atu, ae leai foi ni aupega na la umiaina

* aofaiga pulufana na faa’aogaina, atoa ma ma’nua i la’ua tino, fatafata ma le muliulu.

Itu e fesoasoani mo lē o loo molia

* ua faamauina ni molimau tusitusia mai lona aiga, nuu, ekalesia, lona toalua, fanau, ma fanau a lana fanau ma le toalua o lana tama teine, e lagolago ai le itu lelei o Vaotuua.

* ua salamo o ia

* ua ma’ea ifoga tetele sa masii mai ai le afioaga o Falelatai

* ua ma’ea ona faatino faasalaga i nuu

* na agai lava o ia le ofisa leoleo ina ua tupu le faalavelave

* na ia vave ioeina lona moliaga ina ua tuuina mai i lalo

Faaiuga Faamasinoga

O le itu a leoleo, na talosagaina le amata mai o se faasalaga i le 32 tausaga, peitai na talosagaina e Mauga Precious Chang o loo tulai mo Vaotuua, se faasalaga e amata mai le 16 tausaga.”

Faaiuga Tolaulauina

Sa amata mai le faasalaga i le 25 tausaga faafalepuipui.

* 12 masina to’esea o se tagata lelei ona talaaga ma ua talia foi e aiga e lua le faatoesega

* 12 masina to’esea i itu lelei soifua tautua

* 12 masina to’esea mo ifoga e lua

* 12 masina to’esea mo faasalaga i nuu

* 12 masina to’esea mo le salamo

* 6 masina to’esea sa alu lava ia le ofisa o leoleo

* 6 masina, o se itu o loo atagia e lē o oe na amataina le vevesi

* 6 masina tatala tuutu’uga

* 6 masina vave ioeina

Faasalaga

E 12 tausaga ma le 6 masina e nofo sala ai Vaotuua Faalava’au Auleoleo Pologa i le falepuipui, ae to’esea mai ai aso na nofo taofia ai.

E 69 tausaga le soifua o lenei tamā. E faaipoipoi se tina mai le afioaga o Afega, ma e toalima le la fanau ae 17 fanau a fanau (grandchildren).

O le 1976 ma malaga ai i Niu Sila, ae o le 1990 sa malaga ai i Ausetalia ma faamautu ai. O le tausaga 2018 na toe taliu mai ai i Samoa ma faamautu ai loa i Afega e tausi matua o lona toalua.

(19)