E $10,000 ua pasia e le komiti e tuuina atu mo le faaleleia o fautasi o le a tausinio ese mai le faailoga tupe mo le manumalo e $60,000 tala.
I se faatalatalanoaga ma le taitaifono a le komiti o tu’uga fautasi, le susuga ia Auapaau Logoitino Filipo, na ia saunoa ai, e na o le tolu lava fautasi ua resitaraina i le taimi nei.
E $2,000 tala na pasia e le komiti i le tausaga talu ai e tuuina atu mo le faaleleia o fautasi e fia tauva. Peitai o lea ua toe pasia e le komiti le tuuina atu lea o le tai $10,000 mo le faaleleia o fautasi e fia tausinio.
“Ua tele fautasi ua maitauina e le komiti le faaleagaina aemaise o le moomia o se taimi e ao ona tapena ai fautasi faapea foi ma i latou o le a aloina.”
Saunoa le taitaifono, e lei iai se taimi faatapulaa e faamuta ai le resitalaina o fautasi e fia auai, ae o loo tatala pea le avanoa mo soo se afioaga o iai so latou fautasi.
Na fesiligia foi le taitaifono i sona finagalo pe le o iai se fuafuaga e valaaulia ai fautasi mai Amerika Samoa ma Tonga e pei ona iai i nisi tausaga ua mavae.
Na saunoa Auapaau o le tatou tu’uga fautasi o loo tatou faa’aogaina ai pea foe laau, peitai, o Amerika Samoa ma Tonga, o loo latou faa’aoga e i latou foe sipuni.
O le tolu o fautasi ua mautinoa lo latou finauina o le faailoga muamua e $60,000 tala:
1. Tolotolo Tamauli
2. Don Bosco
3. Segavao.
Saunoa Auapaau, “O le umi ona le toe faataunuuina ni tu’uga fautasi, o le mafuaaga tonu lena ua toe lalaga atu ai le faamoemoe.”
(491)
