Talia ma le Fiafia e le Faalapotopotoga Tumaoti a Samoa le Aso Malolo mo le Tutoatasi

0
26

01 Iuni 2019, Apia Samoa. Ua faaalia e le Peresitene a le Faalapotopotoga Tumaoti a le au fai Pisinisi le Samoa Chamber of Commerce le latou lagolagoina o le aso malolo ua atofaina mo le Tutoatasi, le Aso Gafua aso 3 o le Iuni 2019.

I se faatalanoaga ma le Samoa Global News, na ta’ua ai e le Peresitene o le Samoa Chamber, le susuga ia Jennifer Ula-Fruean le fiafia tele o le au fai pisinisi ina ua nā o le tasi le aso malolo, ae le lua e pei ona masani ai.

“Pau lava le tuualalo a le Faalapotopotoga Tumaoti a le au fai Pisinisi, ina ia vave maua mai se tali mai le Samoa National Tripartite Forum o loo i lalo o le faamalumaluga a le MCIL;

“Sa maua mai loa le tali, o le Aso Gafua 03 Iuni le aso malolo e faatāuaina mo le Tutoatasi o le Malo o Samoa, talia loa ma le fiafia aua sa masani ona lua aso.”

Sa fa’aalia e le taitai o le malo le Afioga ia Tuilaepa Sailele Malielegaoi le atugaluga o nisi o au faipaipisinisi e tusa ai ma le Aso malolo o le Tuto’atasi o le Malo o Samoa i le Aso Gafua o le a sau nei.

Sa taua e Tuilaepa i lana feiloaiga masani ma le vasega o le au tusitala i le vaiaso ua tuanai fuafuaga mo le aso malolo.

“O le iuga a le komiti sa gafa ma tapenapenaga o le tutoatasi e sisi pea le tagavai o Samoa i le aso 1 o Iuni o le Aso To’anai lea, ae ana pau i le Aso Sa o lona uiga e toe tolo i le Aso Gafua ona e tatau ona
ave le faamuamua i le Atua ma le aso o le Alii.

“Sa oo mai le tuualalo a le au fai pisinisi ua le talafeagai le mālõlõ o le Aso Gafua ona ua tele ina gaugau ai latou pisinisi.

“Na ou faamanatu iai ia faataua i o latou loto le aso lenei o le tutoatasi o le malo o Samoa a oo ina faatulaga aso malolo e maualuga a le agaga na maua ai le tatou tutoatasi,” o lana saunoaga lea.

Peitai sa taua e le Peresitene ia Jennifer Ula-Fruean, o loo iai pea le agaaga galulue faatasi ma le fiafia pea i sui o le Faalapotopotoga Tumaoti a le au Fai Pisinisi (Samoa Chamber) e talia le aso malolo e faatauaina ai le Tutoasi a Samoa.

“O le toatele lava o le au fai pisinisi, ua latou taliaina lava le faiga masani o le aso malolo atofaina lea e faamanatu ai le Tutoatasi o le Malo o Samoa”.

Deidre Fanene

31 years old from the village of Leauvaa. Married with three children.
Deidre Fanene